Masobra sa isa ka milyon ka pesos nga balor sang illegal nga druga ang narecover nagikan sa mag-lolo nga naaresto sa ginpatigayon nga buybust operation sa Purok Lubi, Barangay 3, Bacolod City, kahapon sang kaagahon.
Ginkilala ang mga suspetsado nga sanday Belmer Francia, 21 ayos, single, wala sang trabaho kag ang lolo sini nga si Wilfrando Francia, 61 anyos, single kag wala man sang trabaho, lunsay mga residente sang nasambit nga lugar.
Nakumpiskar sa duha ang kapin sa 205 ka gramo sang suspected shabu nga may standard drug price nga 1,394,000.
Sa interview sang Bombo Radyo Bacolod kay Police Captain Joven Mogato, pinuno sang Bacolod City Drug Enforcement Unit, duha ka semana sang mga ini ginmonitor ang subject person antes nadakpan.
Suno kay Mogato ang 21 anyos nga subject person ang first time nga nadakpan bangud sa illegal nga druga apang ang senior citizen ang nakaagi na priso bangud man sa illegal nga druga.
Suno diri, ginakabig na sa karun nga high value individual ang duha.
Suno sa impormasyon sang mga kapulisan angh 21 anyos ang nagakuha sang supply sang illegal nga druga kag ginabaligya sa ila lugar kag sa iban pa nga nagabakal man sang illegal nga druga.
May yara na sang ginasundan ang mga kapulisan nga lead agud matumod kun sa diin nagakuha sang supply sang illegal nga druga si Francia.
Sa karun nagapabilin sa Bacolod Police Station 2 ang mga nadakpan kag natalana nga pasakaan sang kaso nga paglapas sa section 5;11 kag 26 sang RA 9165 ukon Comprehensive Dangerous Drugs Act of 2002.
