Nagdangat sa masobra P5.1 million ang balor sang suspected shabu nga narecover sa ginpatigayon nga drug buybust operation sa Purok Mars, Barangay Singcang-Airport, Bacolod City alas-10:22 kagab-i.
Ginkilala ang subject person kay George Jayme Jr., 49 anyos, High Value Individual, single, wala sang trabaho kag residente sa Burgos Street, Zone 5, Poblacion sa banwa sang Murcia samtang arestado man ang kaupod sini nga si Dharryl Escanuela, 41 anyos, street level individual, single, wala sang trabaho, tumandok sang Olongapo City, Zambales, apang temporaryo nga nagapuyo sa Royal Amri Hotel, 13th Street, Barangay 7, Bacolod City.
Narecover ang pito ka knot tied transparent plastic sachets kag anom ka big heat sealed transparent plastic sachets sang suspected shabu gikan kay Jayme samtang lima man ka big heat sealed transparent plastic sachets ang narecover kay Escanuela.
Ang suspected shabu ang ginabanta nagabug-at sang 775 grams nga nagabalor P5,134,000.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 8, duha man nila ka semana nga ginsurveillance ang duha tubtob nga matigayon ang operasyon.
Pahayag sini nga sa ila monitoring ang supply sang illegal nga droga ang gikan sa gwa sang Bacolod City kag Negros Occidental.
Suno kay Tolentino, anay nadakpan na sa pagbaligya sang shabu si Escanuela, apang ini ang nagbalik lamang sa illegal nga buluhaton sa iya nga paggwa.
Ang duha ka suspetsado ang nakahunong sa karun sa kustodiya sang Bacolod Police Station 8 kag natalana nga pasakaan sang kaso may kaangtanan sa Republic Act 9165 ukon Comprehensive Dangerous Drugs Act of 2002.
