Masobra P700, 000 nga balor sang ginapatihan iligal nga druga ang narekober sang mga pulis nagikan sa lima ka mga persona nga nadakpan sa buybust operation sa ciudad sang Bacolod, Domingo sang gab-i.
Manugtungang gab-i na sang ginpatigayon sang City Drug Enforcement Unit sang Bacolod City Police Office ang buybust operation sa Purok Pine Tree, Barangay Bata batok sa subject nga si Roel Amonin sang Purok Marapara sa amo nga barangay.
Si Amonin ang nabaklan sang isa ka elongated plastic sachet sang suspected shabu.
Magluwas kay Amonin, nadakpan man sanday Jose June Codico, Camelle Benitez kag Francis Mark Rito sang Purok Pine Tree nga nakuhaan sang isa ka elongated sachet sang suspected shabu; kag Janjan Batusin sang Purok Pag-isa, Barangay Bata nga nakuhaan sang duha ka sachet sang ginapatihan shabu.
Magluwas diri, nakuha pa gid sang mga pulis ang 10 ka dalagko nga sachets sang iligal nga druga.
Suno sa CDEU, nagabalor sang 755 mil pesos ang kabug-usan nga balor sang suspected shabu nga nakuha sang mga pulis.
May nakuha man nga isa ka improvised home-made 12-gauge shotgun nga may mga bala.
Nakaangkon naman si Rito sang pilas sa ilong matapos nga makabunggo sa poste sang nagtuyo nga magpalagyo.
