Luyag ni Bacolod City Mayor Alfredo ‘Albee’ Benitez nga mapakita nga ang Masskara Festival ang makabig nga isa sa mga best festival celebrations sa Pilipinas.
Sa interview sang Bombo Radyo kay Councilor Jason Villarosa, chairperson sang Committee on Tourism sa Sangguniang Panlungsod, very succesful ang ginpatigayon nga Grand Salubong sang Biyernes nga gintambongan sang kapin sa 45 mil ka mga tawo.
Suno diri, nangin masadya ang selebrasyon kag on time nga natigayon ang events.
Nakakuha man ini sang feedback gikan sa mga nagtambong nga mga bisita halin sa nagkalain-lain nga bahin sang pungsod kag sa luwas sang Pilipinas, nga madamo sang nag-enjoy kag excited pa gid sa mga palaabuton nga mga activities.
Balantayan suno kay Villarosa amo ang MassKanamit Culinary Competition, Miss Bacolod Masskara, Electric Masskara, kag Masskara Street Dance and Arena Competition.
Samtang, nagpasalig naman ini sa mga Brgy nga maga-compete nga mabaton na nila sa masunod nga semana ang subsidy para sa ila nga preparasyon.
Ang napulo ka participants sang Electric Masskara ang makabaton sang tig- P350,000 kada brgy samtang ang pito ka participants naman sang Masskara Street Dance and Arena Competition ang makabaton sang tig- P700,000 nga subsidy kada brgy.
