Gindagsa sang kapin 45,000 ka indibidwal ang MassKara Grand Countdown Salubong, Byernes sang gab-i, sa Bacolod City Government Center (BCGC).
Nangin madinuagon ang gab-i bangud sa dance performances, games, local bands kag presentasyon sang Miss Bacolod Masskara sa pila ka oras nga programa.
Madamo ang nag-enjoy kag nagsabay sa pagkanta sang nagperform ang mga kilala nga pop-rock band nga December Avenue.
Ginkanta sang mga ini ang pila sa ila nga mga hit songs nga ginalakipan sang Dahan, Eroplanong Papel, Kung ’Di Rin Lang Ikaw, Sa Ngalan ng Pag-Ibig, kag Bulong.
Nag-upod sa Grand Salubong sang nasambit nga kapiyetahan sanday Bacolod City Lone District Congressman Greg Gasataya, Councilor Israel Salanga, Councilor Vladimir Gonzalez, Councilor Cindy Rojas, Councilor Simple Distrito, Councilor Celia Flor, Councilor Thaddy Sayson, Councilor Claudio Puentevella, Councilor Jason Villarosa, Liga ng mga Barangay President Lady Gles Pallen kag anak ni Mayor Albee nga si Victorias City Mayor Javi Benitez.
Nakita man kagab-i sanday Bacolod MassKara Festival chairman Jojie Dingcong; President and Festival Director for Finance, Admin, Concerts, Events, and Fair, Kuster Y. Cadagat; Secretary and Festival Director for Cultural and Accredited Events, Jericho Redil, Treasurer, and Festival Director for Good Governance, Finance, Procurement, and Admin; Food Committee Chairperson Ana Tison; kag Tourism Officer Tere Manalili.
Apisar nga madamo ang mga tawo, wala man nakarecord ang mga kapulisan sang mga untoward incidents.// Sa interview sang Bombo Radyo Bacolod kay Police Captain Francis Depasucat, Station Commander sang Bacolod Police Station 4, naplastar na ang security plans kasubong man ang deployment sang mga kapulisan.
Suno kay Depasucat, may yara man sang police augmentation nagikan sa Negros Occidental Police Provincial Office agud magbulig sa pagbantay sang seguridad sa Masskara Festival.
Dugangpa sini nga 44 kalakip sa iya nga police personnel ang gindeploy samtang may yara man nga mga force multipliers kag iban nga agencies nga nagduty para magpabilin sang seguridad sa kapiyestahan.
Sa karun wala sang reported nga insidente nga nagluntad sa bahin sang Bacolod City Government Center kun sa din ginpatigayon ang Grand Salubong sa Masskara Festival.
Ginpahayag man sang station commander nga may yara sang pagbug-at sang dalagan sang trapiko apang ini ang ginalauman na bangud may yara sang ginapatigayon nga rerouting bangud sa mga aktibidad sa tion sang Masskara Festival.
Nagpanugyan man ini sa mga nagalagaw nga halungan ang personal nga gamit kag kun kinahanglan sang bulig yara man ang mga kapulisan nga handa nga magbulig sa ila.
