Vindicated man sa desisyon sang korte, aminado ang pamilya ni Ilog Councilor Antonio Gequillana nga partial pa lamang nga hustisya ang ila naagom kasunod sang guilty verdict batok sa gunman nga si Ryan Gatoc sang Kabankalan City.
Suno sa spokesperson sang pamilya Gequillana nga si Atty. Lyndon Caña, partial healing pa lamang ang ginabatyag sang balo kag mga kabataan ni Councilor Gequillana bangud ang killer lamang ang naconvict.
Suno kay Caña, handom gihapon sang pamilya sang konsehal nga matumod kun sin-o ang mastermind sa krimen.
Nahibaluan nga tubtub subong, wala pa gid nag-ako si Gatoc kun sin-o ang nagsugo sa iya nga patyon ang konsehal.
Sa pihak sini, nagapasalamat ang pamilya Gequillana sa korte bangud guilty si Gatoc beyond reasonable doubt sa pagpatay sa anay opisyal.
Ginatugyan naman sang mga ini sa Kahitaasan ang pagtaod-taod sang mga hitabo agud matumod kun sin-o ang yara sa likod sang krimen.
Makaligad ang masobra walo ka tuig, napamatbatan na ang suspetsado nga nagpatay sa konsehal sang Ilog, Negros Occidental sa gwa sang isa ka hotel sa ciudad sang Bacolod.
Sa promulgation sang kaso sa Regional Trial Court Branch 42 Bacolod City subong nga Miyerkles sang aga, guilty si Ryan Gatoc sang Kabankalan City sa pagpatay kay Councilor Antonio Gequillana sadtong Hulyo 27 tuig 2011.
Reclusion perpetua ukon 20 tubtub 40 ka tuig nga pagkapriso ang sentensya ni Judge Fernando Elumba batok kay Gatoc.
Hulyo 27, 2011 sang aga, ang 40-anyos nga si Councilor Gequillana ang gintiro ni Gatoc samtang pagwa ini sa East View Hotel sa Circumferential Road, Barangay Villamonte, Bacolod City.
May kaistorya sa cellphone ang konsehal kag manugsakay na kuntani sa iya nga pick-up sang ginpalapitan ni Gatoc kag gintiro.
Sang matumba ang konsehal, gintiro pa ini liwat sang suspetsado sang makatatlo ka beses gamit ang .45 caliber pistol nga nagresulta sa iya nga kamatayon.
Suno sa gwardiya nga nakakita sa krimen, naghulat pa ang suspetsado sa tabok sang hotel antes naggwa ang konsehal nga nagpangape diri antes ang krimen.
Sang patay na ang konsehal, nagpalagyo ang suspetsado sakay sa motorsiklo.
Makaligad ang isa ka semana, nagsungka si Gatoc nga naga-edad pa lamang sadto sang 24 sa Criminal Investigation and Detection Group (CIDG) operatives sa Kabankalan City gani nakasuhan ini sang murder.
Apang tubtub subong, wala gin-ako ni Gatoc kun sin-o ang nagsugo sa iya nga patyon si Councilor Gequillana.
Si Gatoc ang anay bodyguard ni Ilog Mayor Paul Alvarez apang wala sang nakit-an nga ebidensya nga may kaangtanan ang alkalde sa krimen.
