Ginapadayaw ni Mayor Alfredo “Albee” Benitez ang Bacolod Chicken Inasal nga karun opisyal na nga ginakilala nga cultural property sang Bacolod City.
Sa mensahe sang alkalde sa opening sang Bacolod Chicken Inasal festival kahapon, ginpahayag sang alkalde nga ang Bacolod Chicken Inasal ang ginakilala nga kabahin sa Top 100 chicken dishes worldwide.
Kahapon nagpatigayon man sang Inasal tasting activity kun sa diin natilawan ang nanarisari nga timpla sang Chicken Inasal gikan sa nanarisari nga mga chef.
Sa pihak nga bahin, gin-athag ni Councilor Em Ang, ang author sa ordinansa sa pagdeklarar sang Bacolod Chicken Inasal Festival, nga nabatun nila ang email sang National Commission for Culture and the Arts (NCCA) nga nagahatag sang cultural property rights sang Bacolod Chicken Inasal sa ciudad.
Paathag sang konsehal nga ang NCCA ang nagapublish kag consolidate sang tanan nga mga cultural properties sa Pilipinas.
Suno diri, matapos nga maaprubahan sa konseho, sila ang nag-apply pa sa NCCA kag nangin malawig pa ang proseso.
Ilabi na nga indi lamang Bacolod City ang may claims sa Chicken Inasal.
Nagalaom ini nga ipadala na sang NCCA ang certification sa masunod nga inadlaw.
Sa pihak nga bahin, gin-athag man sini nga ini na ang ika-apat nga selebrasyon sang Bacolod Chicken Inasal festival.
Apang suno kay Ang, sang 2008 ukon 2009 may ginpatigayon na nga Manokan Festival apang ini ang eksklusibo lamang sa Manokan Country.
Sa pagpungko sini bilang konsehal, ginpropose sini nga ma-amyendahan ang daan nga local ordinance kag ma-expand ang selebrasyon sa bilog nga Bacolod City, nga naaprubahan sa konseho sang 2018.
Nakapatigayon sang una nga selebrasyon sang 2018 kag 2019 apang nauntat bangod sa pandemica, kag nabalik na lamang sa Benitez Administration.
