Nagapakig-unong si Bacolod City Mayor Alfredo ‘Albee’ Benitez sa pamilya sang manunudlo nga napatay kag sang iban pa nga napilasan matapos natumba ang bus nga ginapanag-iyahan sang Bacolod City government sa Purok Talos, Barangay Igmayaan, Salvador Benedicto kahapon sang hapon.
Sa statement nga ginpagwa ni Benitez, ginakasubo sini ang aksidente nga nagresulta sa kamatayon ni Arlyn Tolosa Verde, Grade III teacher sa Paglaum Village Elementary School, kag pagkapilas sang 35 ka iban pa nga manunudlo kag staff.
Suno sa alkalde, committed ang city government nga magsuporta kag maghatag sang assistance sa pamilya sang mga napilasan.
Suno diri, naghatag ang city government sang hospital assistance sa idalom sang Bacolod Comprehensive Health Program sa mga biktima nga ginalakipan sang bulong, laboratory, X-Ray kag iban pa.
Iga-assess man sang Department of Social Welfare and Development ang iban pa nga kinahanglanon agud nga makarelease sang assistance.
Suno kay Benitez, nagacoordinate ang city government sa mga local hospitals agud masiguro nga makabaton sang maayo nga pagbulong ang mga pasyente.
Magapatigayon naman sang maid-id nga imbestigasyon agud nga madeterminar ang kabangdanan sang aksidente agud nga indi na ini matabo liwat.
Nahibaluan nga ang bus nga natumba kahapon ang ginamaneho ni Nelmo Gonzaga sang Barangay Handumanan.
