Ginpirmahan na ni Mayor Evelio Leonardia ang resolusyon nga naga-extend sang implementasyon sang “No Segregation, No Collection” policy sa Abril 1, 2020.
Nahibaluan nga ang resolusyon ang nadihon kasunod sang pagsinapol sang Liga ng mga Barangay sang Sabado kun sa diin ila ginhingyo nga i-extend anay sa Abril 1, ang implementasyon sang polisa sa baylo nga sa orihinal nga Marso 1.
Santo sa opisyal nga flyers nga ginapanagtag sang ciudad, ang mga madunot nga basura ang dapat nga ang tagbalay ang magahimos sini, ang mga recyclable ang kuhaon ang barangay ukon ciudad kag ang residual waste ukon ang indi na gid mapuslan nga basura, ang hakuton sang IPM Construction and Development Corporation.
Samtang subong nga semana, magasapol ang city government sa mga tag-iya sang junk shop nga posible baligyaan sang mga recyclable materials.
Aminado si Mayor Leonardia nga mabudlay ang pagpatuman sang “No Segregation, No Collection” policy apang indi naman ini imposible.
