Nagpanawagan ang alkalde sang banwa sang Moises Padilla sa mga rebelde nga magsungka na kasunod sa pagkapatay sang anum ka tuig nga bata nga nasalabat sang bala sa nagluntad nga engkwentro sa tunga sang 62nd Infantry Battalion sang Philippine Army kag New People’s Army sa Sitio Matil-e, Barangay Quintin Remo, Moises Padilla, Negros Occidental kahapon sang aga.
Sa interview sang Bombo Radyo Bacolod kay Mayor Ella Yulo, naesturya na sang Department of Social Welfare and Development ang pamilya sang bata kag handa ang Local Government Unit nga magbulig sa gasto sa pagpalubong.
Suno diri, ang balay sang pamilya nahamtang sa idalum sang pangpang kag ang natabo nga pagbayluhanay sang lupok sa tunga sang militar kag NPA yara sa sa ibabaw nga bahin sang bukid.
Suno kay Yulo, ang engkwentro nag-umpisa sa Sitio Matil-e, sa bahin sang Guihulngan City, Negros Oriental apang mahimo nga may natabo nga lagsanay sa engkwentro tubtob nakalab-ot sila sa Barangay Quintin Remo, Moises Padilla nga yara sa border.
Naigo ang bata sang stray bullet sa ulo nga gintunaan sang gilayon sini nga kamatayon.
Pahayag ni Yulo, matawhay lamang kun tani ang pangabuhi sang mga Indigenous people sa bukid kag mapisan man sila mangita sang palangabuhian apang delikado lamang ang ila safety.
Suno pa diri, ang mga nagapangabuhi sa ibabaw sang bukid makalooy bangod kun kaisa sila ginapamangkot sang militar kun sin-o ang mga NPA kag kun kaisa sila ginasuspetsohan sang NPA nga asset sang militar.
