Nagapadayon ang suporta sang Bacolod City Government sa mga atleta sang ciudad sang Bacolod.
Ini matapos nga gin-aprubahan sang Sangguniang Panlungsod ang P17.3 million nga financial assistance para sa mga atleta nga magahampang sa Palarong Pambansa nga patigayunon sa Agusan Del Sur sa Mayo 24 tubtob Mayo 31.
Sa interview kay Bacolod City Mayor Greg Gasataya, kaupod ang Department of Education-Division of Bacolod City sa pagpanguna ni Schools Division Superintendent Dr Dennis Develos ang Memorandum of Agreement sa P17.3 million nga financial assistance sa mga atleta nga magahampang sa Palarong Pambansa 2026.
Ang nasambit nga financial support ang para sa 286 ka mga atleta nga magarepresentar sang Bacolod City.
Ang assistance package nagalakip sang transportasyon, akomodasyon, sapatos, kag uniporme para sa mga atleta.
Kapin 188 ka mga atleta, coaches, assistant coaches, trainers, kag chaperones ang makabaton man sang P4,000 nga playing allowance, P6,000 para sa pagkaon, kag P9,000 para sa training.
Suno Kay Gasataya ang pondo ginakabig sang city government nga isa ka investment sa mga pamatan-on kag nagpabutyag sang paglaum nga sa ulihi ang Bacolod maka-produce sang isa ka Olympian pinaagi sa padayon nga grassroots sports development.
