Nangin madinalag-on ang ginpatigayon nga Masskara Festival 2025 Arena and Street Dance competition – Barangay Category kahapon.
Apisar nga nag-init sang aga kag nag-ulan sang makadali sang hapon natapos sang matawhay kag madinalag-on ang nasambit nga competition.
May yara man sang mga dancers nga nagkalalipong apang gilayon man nga gin-atinder sang medical responders.
Sa interview sang Bombo Radyo Bacolod kay Bacolod City Mayor Greg Gasataya, nagapasalamat nga natigayon ang mga aktibidad apisar sang pabag-o bag-o nga tiyempo.
Suno kay Gasataya, ang kalipay sini nga nabatyagan sa karun ang wala sang katupong bangud madamo sang mga pagtilaw nga na-agyan samtang ginapatigayon ang festival sa sulod sang masobra duha ka semana.
Suno sa alkalde nga wala ini naglaom nga mangin maayo ang tiyempo bangud nga sang Sabado nangin maulanon ang panahon.
Nagpasalamat man ini sa tanan nga mga kabarangayan kasubong man sa mga eskwelahan nga nagpasakop sa nasambit nga competition sa Barangay kag Schools category bisan nga gin-ulan kag gin-initan nagpadayon sa gihapon sa pagperform.
Ginpasalamatan man sini ang tanan nga nagkooperar kag nagsuporta para matigayon ang 19 ka adlaw nga selebrasyon sang Masskara Festival 2025.
