Ginpangayo na ni Bacolod City Mayor Greg Gasataya ang listahan sang mga pamilya nga luyag masaylo sa relocation site gikan sa mga nasunugan sa Prk Katilingban, Brgy 39, Bacolod City.
Sa interview sang Bombo Radyo Bacolod sa alkalde, ipatsekyar pa sini ang development sa kaso sang duta.
Nahibaluan nga dako nga bahin sang nasunugan ang kabahin sa duta nga gindonar sang Lizares Family sa Negros Occidental Provincial Governmet, apang bangod wala nagamit sa intended purpose santo sa Deed of Donations, ini ang ginabawi sang pamilya.
Sa karun padayun pa ang accounting sa kabug-usan nga households nga apektado, nga sa inisyal nagdangat na sa halos 900 ka indibidwal.
Suno diri, ang totally damaged ang balay ang makabatun sang P15,000 cash assistance, P10,000 sa partially damaged kag P5,000 para sa mga renters kag sharer.
Matapos ang validation sang Department of Social Services and Development, ang ciudad ang magapadala sang dugang nga bulig, kalakip na ang atop para sa reconstruction sang mga balay.
Kun makuha na ang numero sang pamilya nga luyag marelocate, ang ciudad ang mangita man sang available nga relocation areas sa Bacolod Housing Authority, kag sa City Legal Office sa pagproseso sang mga dokumento.
