Naghatag sang report kahapon ang alkalde sang Silay City tuhoy sa iya una nga 100 ka adlaw sa opisina.
Sa speech ni Mayor Joedith Gallego sa covered court sang Silay Public Plaza, ginpatpat sini ang iya mga accomplishments sa una nga 100 ka adlaw sini sa pagpungko bilang alkalde sang ciudad.
Una nga ginreport ni Gallego amu nga sa una sini nga adlaw sa office, ginsaylo sini ang Office of the City Mayor sa first floor nagikan sa second floor.
Ini agud mangin mahapos para sa mga pumuluyo ilabi na sa mga senior citizen kag person with disabilities ang magpadulong sa iya opisina.
Ginpasalamatan man sini ang Philippine National Police sa ila kampanya batok sa illegal nga druga kag pagmintinar sang peace and order sa ciudad.
Nalakip man sa iya report ang plano nga pagpatukod sang bag-o nga City Hall kun sa diin nagikan sa P1 billion nga budget, ini ang ginhimo na lamang P500 million bangud ang P500 ang pagagamiton sa pagtukod sang City College sa ciudad.
Libre man suno sa iya ang pagpagamit sang school bus sang ciudad para sa mga estudyante nga padulong sa Bacolod.
Sa una nga tatlo ka bulan sini sa opisina, nakapay-o naman ang mga dalan padulong sa rural barangays kag naghatag ini sang libre nga transportasyon sa mga manunudlo nga padulong sa rural barangays.
Sa kabug-usan kapin 30 ka puntos ang ginpatpat sang alkalde sa iya speech.
Pagkatapos sang State of the City Address, nagpatigayon sila sang ribbon cutting para sa pagbukas sang Silay Street Food Alley.
