BACOLOD CITY — Gin-akigan ni Negros Occidental Governor Alfredo Marañon Jr. ang medical staff sa Teresita Lopez Jalandoni Provincial Hospital nga nagpabaya sa pag-atender sa iloy nga si Remarie Prayco sang Barangay E. Lopez, Silay City nga nagresulta sa kamatayon sang iya kapid nga lapsag.
Sa panaysayon sang lola nga si Elisa Prayco, nagpadulong sa provincial hospital si Marañon sang Hunyo 30 kag ginpatawag ang mga doktor kag midwife nga nag-atender kay Remarie, kalakip naman ang chief of hospital nga si Dr. Estrella Ledesma.
Gin-akigan ni Marañon ang midwife nga si Nieve Villalon nga amo ang naghambal kay Remarie nga indi ini mapaidalom sa Ceasarean section bangud wala sang kwarta nga inugbayad.
Nagpanindugan pa si Villalon nga wala siya nakahambal sini apang ginpamilit man ni Remarie nga tandaan niya ang itsura sang midwife.
Ginhambalan sang gobernador si Villalon nga indi maghambal sang malain nga tinaga sa mga pasyente bangud masakit ini batyagon kag wala man ini nakahibalo sang ginabatyag sang pasyente.
Suno sa gobernador, ginadumalahan sang probinsya ang TLJPH kag may yara sang Negros Occidental Comprehensive Health Insurance Program kag PhilHealth nga nagasalo sa balayran sang mga pasyente.
Mandu sang gobernador, atenderon sang medical staff sang maayo ang ila trabaho.
