BACOLOD CITY – Naghingyo sang pasaylo ang delegation physician sang Negros Occidental sa sala nga numero sang mga delegado sa Western Visayas Regional Athletic Association Meet 2018 nga naglain ang pamatyag samtang nagapadayon ang hinampang sa ciudad sang Iloilo.
Sang Lunes, ginpahayag sang physical therapist nga si Alline Vieja nga malapit 400 ang yara sa ila rekord nga gindala sa clinic sang La Paz 1 Elementary School agud mahatagan sang atensyon medikal.
15 ka mga atleta suno diri ang nagsufrer sang loose bowel movement samtang may nagbatyag naman sang muscle pain kag ginhilanat bangud namag-o sa panahon kag may nagpangayo sang bulong para sa hyper-acidity kag allergy.
Miyerkules sang aga, gin-ako ni Dr. Joey Villarosa nga nagsala ang iban nga miyembro sang medical team sa figure nga ginhatag sa Bombo Radyo.
Suno diri, nalakip sa pag-isip ang mga delegates nga nagpabulong sang ginpatigayon ang Area 3 Meet sa Silay City kag provincial meet sang Negros Occidental rason nga nagsaka ini sa 367.
Sa actual nga treatment record suno kay Villarosa, 40 lang ka pasyente nga nagabatyag sang nagkalain-lain nga kondisyon ang gindapatan sang pagbulong humalin Pebrero 16 tubtub 18.
Humalin Pebrero 16 tubtub alas 12:00 sa udto sang Pebrero 20 suno sa doktor, 105 lamang ka delegates ang nagpakonsulta sa clinic kag ginhatagan sang treatment.
