Gin-athag ni Senator Francis “Kiko” Pangilinan nga wala sang kaangtanan sa pagpadalagan para sa 2028 national elections ang natalana nga pagkitaay nanday President Ferdinand ”Bongbong” Marcos Jr. kag former vice president kag incumbent Naga City Mayor Leni Robredo.
Suno kay Pangilinan, na-finalize na ang pagbisita ni Marcos sa Naga City sa Sabado, Pebrero 21, antes pa man nag-anunsiyo si Vice President Sara Duterte sa iya plano nga magpadalagan bilang presidente.
Pahayag niya, ini base sa ila pagsinapol kay Executive Secretary Ralph Recto duha ka semana ang nakaligad.
Una na nga ginkumpirmar ni Palace Press Officer Undersecretary Atty. Claire Castro nga magakitaay sanday Marcos kag Robredo para sa pagpatuman sang Oplan Kontra Baha sa Naga City, Camarines Sur.
Ginpahayag ni Castro nga wala pa sang impormasyon nga ginhatag kun istoryahan sang duha ang plano sa politika.
