Ginapaabot nalang sang Bacolod City Water District ang pagbalik sang kontrata nagikan sa Office of the Government Corporate Counsel agud nga mapirmahan na ang memorandum of agreement kaupod ang Murcia Water District para sa dugang nga water supply.
Suno kay BACIWA general manager Mona Dia Jardin, padayon na ang proseso para sa signing sang memorandum of agreement sa Murcia Water District nga makahatag sang dugang nga tubig.
Suno kay Jardin, ginpareview sa Office of the Government Corporate Counsel ang kontrata bangud indi ini mapirmahan samtang wala nareview sang OGCC.
Ang nareview nga kontrata ang inughatag na sa BACIWA subong nga adlaw ukon sa masunod nga semana bangud ginpadala ini sa OGCC masobra duha na ka semana ang nakaligad.
Kun mag-abot ang kontrata, mapatigayon na ang signing kag masuguran na ang pito ka bulan nga ginpromisa sang Murcia Water District nga sila ang madeliver sang 50 million liters per day nga tubig.
Suno sa BACIWA general manager, may negosasyon na sadto sa MWD kag nafinalize sang siya na ang nagpungko sa pwesto.
Sa karon, 15 million liters per day ang kulang sa karon sa supply sang BACIWA gani may yara sang sobra nga 35 million liters per day nga igasupply sang MWD kag ini ang igahatag sa mga lugar nga may kakulang sang supply.
Ang tubig nga igasupply sang MWD ang magahalin sa surface water kag indi sa deep well.
Naghingyo si Jardin sang pasaylo sa reklamo sang mga pumuluyo apang gamay nalang nga tinion ang kinahanglan agud nga mahitso ang kontrata sa MWD.
