BACOLOD CITY – May tsansa ang mga atleta gikan sa ciudad sang Bacolod nga makaani sang medalya sa patigayunon nga 12th Southeast Asian Youth Athletics Championships sa ciudad sang Ilaga, probinsiya sang Isabela.
Ini ang ginpahayag ni Miss Adriana “Addy” Arca, ang coach sa athletics sang apat ka mga estudyante sang Romanito Maravilla National High School sa Barangay Estefania, nga amo ang magatiglawas sang Pilipinas sa nasambit nga hinampang.
Suno kay Coach Addie, naka-adjust na sanday Joycee Veranio, Bernalyn Bejoy, Trixie Dela Torre kag Charles Largavista sa paghampang kag tuman man ang ginhimo nila nga preparasyon.
Dugang pa ni Arca, nakita sini ang ikasarang sang nasambit nga mga atleta durante sang ginpatigayon nga Negros Island Region Atheltic Association (NIRAA) Meet kag base sa comparative results, daku gid ang tsansa sang mga ini nga magdaog sang medalya.
Apang sa pihak sini, ginpahayag ni Coach Addy nga wala sila nagapawala bangud indi man lahug-lahog ang ila mga kontra gikan sa Southeast Asian countries kaangay na lamang sang Vietnam nga isa sa may pinakamadamo nga delegasyon sa SEA Youth Athletics sini nga tuig.
Suno kay Arca, ila na nakita ang ikasarang sang Vietnam sang ila maatubang ang mga ini sa hinampang sa Brunei sang nagligad nga duha katuig kag maayo man maghampang ang mga ini.
