Nagdangat sa masobra P1.3 million ang ginhatag nga cash incentives sang Negros Occidental Provincial Government sa mga atleta nga nakakuha sang medalya sa Palarong Pambansa 2025.
Nagdangat sa 180 ang kabug-usan nga atleta nga nakabatun sang reward nga ginlakipan sang P10,000 para sa gold medalist, P7,000 sa silver medalist kag P4,000 sa bronze medalist.
Sa interview sang Bombo Radyo Bacolod kay Department of Education Negros Island Regjon Director Dr. Ramir Uytico, ang Negros Occidental ang may pinakamadamo nga nakuha nga gold medal para sa Western Visayas.
Kun sa diin 18 ang nakuha nga gold medals.
Apang kalakip diri ang Softball Secondary Boys, kun sa diin kada isa sa miyembro sang team ang ginhatagan sang P10,000.
Nagdangat sa P490,000 ang nahatag para sa gold medals; P518,000 para sa silver medal kun sa diin may-ara sang 74 ka atleta nga nakabatun; samtang P376,000 naman ang nahatag sa bronze medalist.
Iban sa mga atleta ang may-ara naman sang masobra sa isa nga medalya.
Samtang luwas pa diri, may ginahatag man nga adisyunal nga P10,000 sa kada mabreak nga record
Bangod si Nico Villaran sang Romanito Maravilla National High School ang may duha ka gold, kag nabreak ang parehas nga record, siya ang nahatagan sang P40,000.
Magluwas sa ila, may cash incentives man nga nabatun ang mga coaches.
Sa speech ni Uytico sa programa nga ginpatigayon sa social hall sang Negros Occidental Provincial Capitol, gindayaw sini ang insiyatibo sang probinsya sa pagkilala sa kapisan kag pagtinguha sang mga atleta.
