Ginkalingaw sang isa ka manunudlo ang pagsunlog sini sa iya mga baboy nga ihawaon kun sin-o man ang una nga mag-giyo, kag amo man nga nag-untat sa pag-giyo ang mga baboy.
Gin-upload ni Marx Barquilla ang video sini kun sa diin kaangay nga naghampang ini sa iya mga baboy nga nagapalapit sa iya kun tawagon.
Kag kun kiboton naman sini, lunsay nagadinalagan naman palayo sa iya ang mga baboy.
Didto na sini ginsunlog ang mga baboy kag ginhambalan nga luto-on sini kun sin-o man ang una nga maggiyo.
Ang mga baboy, nag-untat sa paglakat kag wala na naggiyo.
Suno kay Marx, instinct na sang baboy nga magpalagyo kun ginakibot kag mag-untat agud batyagon ang ila palibot.
Suno kay Dr. Romulo Bernardo, wildlife veterinarian, indi derekta nga maka-intindi ang mga baboy sa ginahambal sang tawo apang mahimo sila matudloan paagi sa pag-giyo ukon gestures.
Dugang pa sini may tatlo ka pamatasan ang mga sapat kun yara sila sa delikado- ang pagbato, pagpalagyo kag mag-akto nga kaangay nga patay.
Suno pa diri, gulpyada lang nag-untat ang mga baboy kun ginabatyag nila ang sitwasyon agud paminsaron kun ano ang ila himoon kun bala malagyo ukon magbato.
Sa sitwasyon sang mga baboy sa video, bangod nga mga bata pa ini, nagfreeze sila ukon nag-untat sa paggiyo.
Apang, ihawon gid man bala ang mga baboy?
Suno kay Marx, mga bata pa ang mga ini kag dapat pa nga padako-on.
Samtang, nag-ayo si Marx nga indi pagpakalainan ang ila palangabuhian bilang swineherd ukon manug-baboy.
