Siyam na ang kabug-usan nga benepisyaryo sang social amelioration program sa Victorias City, Negros Occidental nga nadakpan nga nagbakal sang iligal nga druga kag nagsugal gamit ang cash grant nga nabaton nagikan sa gobyerno kadungan sang COVID crisis.
Sa interview sang Bombo Radyo kay Police Lt. Col. Eduardo Corpuz, hepe sang Victorias City Police Station, 11 ang ila nadakpan sa anti-drug kag anti-illegal gambling operations kag siyam sa mga ini ang kumpirmado nga nakabaton sang P6, 000 nga cash grant sa idalom sang SAP, santo sa kumpirmasyon sang barangay officials.
Madumduman nga sang Lunes sang gab-i, duha ka mga babayi kag isa ka lalaki ang nadakpan matapos nagbaligya sang ginapatihan iligal nga druga sa Villa Miranda, Barangay 6A, Victorias City.
Ang mga arestado amo sanday Maricar Dolendo, 37-anyos, kasado kag residente sang Barangay 6A; Jerson Miranda, 29-anyos, sultero kag residente sang amo man nga barangay; kag Belen Castro, 42-anyos, single kag residente sang Barangay Mambulac, Silay City.
Matapos mabaklan sang isa ka sachet sang suspected shabu, nakuhaan pa gid ang tatlo sang anom ka sachet sang iligal nga druga nga nagabalor tanan sang indi magnubo P20 mil.
Sang Abril 21, anom naman ka mga persona ang nadakpan nga nagahampang sang illegal nga pasugal sa ciudad kun sa diin gintaya sang mga ini ang kwarta nga ila nabaton nagikan sa SAP.
Kahapon, tatlo naman ang nadakpan nga nagahampang sang ‘tong its’ sa Barangay 19, Victorias City kag duha sa ila ang benepisyaryo sang Pantawid Pamilyang Pilipinong Program (4Ps).
Suno kay Corpuz, priso subong ang tatlo nga nadakpan sa buybust operation bangud nakasuhan na ang mga ini paagi sa electronic inquest samtang ang nadakpan naman nga mga tahor ang pasakaan sang kaso paagi sa regular filing.
