Nakacontact pa sa pamilya ang mga persona nga gin-abduct sa Barangay Vista Alegre, Bacolod City, sang Hunyo 2, tatlo ka-adlaw matapos ang insidente.
Sa interview sang Bombo Radyo Bacolod kay Police Lt. Col. Ronnie Brillo, commander sang Bacolod City Mobile Force Company kag spokesperson ni Bacolod City Police Office (BCPO) Director Police Col. Noel Aliño, naghatag na sang derektiba ang City Director sa Bacolod Police Station 7 kasubong man sa intelligence kag investigation unit sang BCPO nga maidid nga imbestigaran ang kaso.
Kahapon, nagdangop sa Bombo Radyo Bacolod si Trisha Antiquera kag ginsaysay ang pag-abduct sa iya live in partner nga si Junel Nangan kag sa iya iloy nga si Loreville Antiquera kag live-in partner sini nga si Joen Villacojer sang Hunyo 2 sang gab-i.
Suno kay Brillo, sa ila imbestigasyon, ginpahayag sang witness nga nakakita sang ginsakay sa puti nga taxi nga Toyota Avanza, nga wala man sang nakita nga coercion ukon pagpwersa sa tatlo, kalakip ang apat ka tuig nga lalaki nga hinablos ni Trisha.
Ang bata ang ginbilin sa ciudad sang Bago, kag ini ang may dugo sa bayo nga suno diri tuga sang paglampos sang armas-luthang sa mga biktima.
Pahayag sang bata nga lima ka mga armado nga persona ang yara sa sulod sang Avanza kag nahibaluan nga may mga motorisklo pa nga ginapatihan look-out.
Sa paghinun-anon sa pamilya, nahibaluan nga nakacontact pa ang mga biktima sa sulod sang tatlo ka adlaw matapos ang abduction, apang nagapamangkot lamang kun kumusta ang kahimtangan sang mga nabilin nga pamilya kag wala na na-estoryahan ang natabo nga pagtaban sa ila.
Ang conversation sa messenger ang nabasa man mismo sang imbestigador.
Sa karun isa sa ginatutukan nila amo ang background ni Villacojer nga makapila na magbalik-balik sa prisuhan bangod sa kaangtanan sa illegal nga droga.
Nahibaluan nga si Loreville Antiquera, nga anay empleyado sa Social Security System (SSS) ang may kaso man bilang fixer sa Land Transportation Office (LTO).
