Ginkumpirmar sang media relations officer sang Vallacar Transit Incorporated nga wala sang pag-untat sa biyahe ang ceres bus sa tion sang tigkalalag.
Sa interview sang Bombo Radyo Bacolod kay Jade Marquez, ang ceres bus ang padayon nga magabiyahe apisar nga holiday bangud ini ang mandato sang ginkuha nila nga prankisa sa Land Transportation Franchising and Regulatory Board (LTFRB).
Ginalauman na sang pamunuan sang Vallacar Transit Incorporated nga magadagsa ang pasahero sa Oktubre 28 bangud sa long weekend matapos nga gindeklarar na ni President Ferdinand “Bongbong” Marcos Jr. nga special non-working holiday ang Oktubre 31.
Ginkumpirmar man ni Marquez nga nagpasaka na sila sang pamasahe matapos nga ini ang gin-aprubahan na sang LTFRB.
Suno diri, indi man nila luyag nga magpasaka sang pamasahe apang kinahanglan ini bangud kinahanglan man nila magsurvive para makapadayon man sa ila operasyon kasunod sang asod-asod nga pagsaka sang presyo sang gatong.
Nagpasalig man si Marquez nga magapadayon sila sa paghatag sang serbisyo kag siguruhon nga hilway ang mga pasahero sa dalanon kasubong man nga indi makawatan ang ila mga kagamitan bangud ini man ang tion nga madamo sang nagapamintaha.
Nagaupod man ang Vallacar Transit Incorporated sa Oplan Ligtas Biyahe subong nga holiday.
