Nagpatigayon sang road safety seminar ang Land Transportation Office subong nga adlaw may kaangtanan sa pagsaulog sang Road Safety Month.
Kaina sang aga, may ginpatigayon nga motorcade kag programa sa Bacolod City Police Office nga gintambungan sang lain lain nga departamento kag sektor.
Kalakip diri ang Traffic Management Unit sang BCPO, Bacolod Traffic and Transport Management Department, Land Transportation Franchising and Regulatory Board, samtang naghatag man sang mensahe si Bacolod City Mayor Greg Gasataya.
Nagpatigayon sang safety seminar nga gintambungan man sang mga opisyales sa mga Local Government Units, jeepney drivers, kag mga delivery riders.
Sa interview sang Bombo Radyo Bacolod kay Police Major Elmer Bonilla, head sang BCPO Traffic Management Unit, importante ang refresher seminar para liwat mapahanumdom sa mga motorista ang pagsunod sa mga traffic rules.
Ini ang makapanubo sang tyansa sang mga aksidente sa dalanon kag iban pa nga epekto sang traffic violations. Samtang, ginpatigayon sa Bacolod City Police (BCPO) ang seminar sa pagselebrar sang National Road Safety Month subong nga adlaw.
Sa interview sang Bombo Radyo kay Land Transportation Office- Negros Island Region (LTO-NIR), assistant Regional Director Monico Puentevella Jr, importante nga mapahibalo sa mga road users nga dapat maghalong sa pagbyahe.
Suno diri, kun magbyahe indi lamang nga ang kaugalingon ang paminsaron kag magpawala lang sa pagmaneho, apang dapat paminsaron man ang pamilya kag abyan nga nagahulat nga safe ang ila ginapalangga nga makapauli.
Samtang, nagpangayo ini sang pag-intindi nga bag-o pa lamang nag-umpisa ang LTO NIR kag ang budget ginakuha pa nila sa gihapon gikan sa Region 6 kag Region 7.
Dugang pa sini, skeletal force pa lamang ang ila trabaho amo nga dako nga bulig sa ila ang social media sa pagmonitor sa traffic violators.
Mensahe sini, gamiton ang common sense, magsunod sa traffic rules kag maghalong sa dalan bangod may nagahulat sa panimalay sa inyo pagpauli.
