Nagahimo na sang tikang ang Provincial Health Office (PHO) agud mapadamo ang mga ospital nga pwede maka-akomodar sang mga pasyente nga may yara sang sintomas sang 2019 novel coronavirus acute respiratory disease (NCOV-ARD) ukon mga persons under investigation (PUI’s).
Suno sa PHO, ila karon nga ginapahanda ang Teresita Jalandoni Provincial Hospital sa ciudad sang Silay, Cadiz District Hospital, Kabankalan District Hospital kag Valladolid District Hospital.
Samtang, nagapakig-angot naman sila sa San Carlos District Hospital kag Bago District Hospital bangud sa mga pantalan nga nahamtang sa ila lugar nga posible mangin entry sang mga persona nga may yara sang virus.
Suno kay Vice Governor Jeffrey Ferrer, posible man nga maghimo sang provincial ordinance ang Negros Occidental kun sa diin magahatag ini sang penalidad sa mga private hospitals nga nagapamalibad nga magbaton sa mga pasyente nga may yara sang sintomas sang 2019 novel coronavirus acute respiratory disease (NCOV-ARD).
Magluwas diri, nagpagwa naman sang executive order si Governor Eugenio Jose Lacson kun sa diin magatukod sang barangay health emergency team ang kada barangay agud ma-monitor ang entry sang mga tawo nagikan sa China kag sa mga lugar nga may yara sang confirmed cases sang virus.
Dugang pa ni Ferrer nga handa man ang Sangguniang Panlalawigan nga magpasar sang resolusyon agud makapagwa ang probinsiya sang pondo para sa kampanya batok sa coronavirus.
