Nagpatigayon sang prayer rally kag indignation ang mga estudyante, mga manunudlo, kag principal sang Sum-Ag National High School para kay Pearl Joy Galve, nga grade 10 student sang nasambit nga buluthuan.
Sa interview sang Bombo Radyo Bacolod kay Warlito Rosareal, School Principal sang Sum-Ag National High School, nagtipon ang kapin 5,000 ka mga estudyante agud maghalad sang pagpangamuyo para sa hustisya matapos nga ini ang nasapwan nga wala na sang kabuhi sa Hacienda San Roque Barangay Cubay sa ciudad sang La Carlota sang Agosto 14.
Kabahin sang prayer rally ang panawagan sa katapo sang Philippine National Police kag iban pa nga law enforcement agencies nga solbaron ang kaso agud nga makuha ang hustisya sa kamatayon sang biktima.
Luyag man ipalab-ot sang buluthuan ang amo nga insidente kay President Ferdinand ‘BongBong’ Marcos Jr.
Ginakondenar man sang eskwelahan ang ginhimo sa 15 anyos nga dalagita.
Panawagan naman sang school principal sa mga ginikanan nga kun indi gilayon nga makapauli ang mga kabataan sa oras sang ila nga buhi, magkoordinar sa mga manunudlo.
Samtang nag-install na ang pamunuan sang eskwelahan sang CCTV sa tatlo ka mga gate sang Sum-Ag National High School.
Nagalaom man ini nga paagi sa broadcast media mabatian sang gobyerno ang ila nga panawagan.
