Nagdangat sa halos 200 ka indibidwal gikan sa La Carlota kag Bago City ang narecord nga nag-evacuate bangod sa paglupok sang Bulkan Kanlaon kahapon, samtang may apat man ka banwa kag ciudad nga nagkanselar sang klase.
Ang 30 ka pamilya nga narecord gikan sa Brgy Ara-al, La Carlota City ang nagsaka sa 34 ka pamilya ukon 115 ka indibidwal kaina sang aga.
Samtang luwas diri, may mga nagbakwit man sa Brgy Ilijan, Bago City nga 26 ka pamilya ukon 80 ka indibidwal.
Ang mga local government units nga nakaeksperyensya sang light ashfall kahapon ang ginalakipan sang Bago City, La Carlota City, Pontevedra, La Castellana, Hinigaran kag Valladolid.
Nagdeklarar naman sang pagkanselar sang klase sa tanan nga levels, sa parehas nga pampubliko kag pribado ang La Carlota City, La Castellana kag Moises Padilla sa Negros Occidental, kasubong man ang Canlaon City, sa Negros Oriental.
Sa interview sang Bombo Radyo Bacolod kay Office of the Civil Defense – Negros Island Region Director Donato Sermeno III, ginapreparahan na nila ang pagpasaka sa Alert Level 3 sa Bulkan Kanlaon kahapon.
Apang bangod madasig lamang ang pagbuga sang abo sang bulkan, napabilin sini ang Alert Level 2 status.
Sa karun, padayun nga ginabantayan ang bulkan, apang sila ang wala naman sang namonitor nga volcanic activities matapos sang natabo nga moderately explosive eruption.
