Nagbalik na sa normal ang sitwasyon sa ciudad sang San Carlos kasunod sang pagbaha sang Sabado, Enero 16 sang gab-i.
Ginpahayag ni San Carlos City Mayor Renato Gustilo nga nakabalik na sa tagsa ka mga panimalay ang nag-evacuate nga mga pumuluyo.
Gin-athag sini nga ang tuman nga ginbaha ang Purok Germilina kag Villarante nga nasakupan sang Barangay 2, San Carlos City.
Pahayag pa ni Gustilo nga 20 ka tuig na ang nakaligad sang magluntad man ang mataas nga baha sa lugar apang makabig nga mas mataas ang tubig-baha sang Sabado kun sa diin, pila sa mga pumuluyo ang makita nalang nga yara sa babaw sang atop sang panimalay.
Paathag sang alkalde nga isa sa ginalantaw nga kabangdanan amo ang paglain sang banas sang mga sapa.
Nahibaluan nga sadto, deretso ang banas sang sapa apang sa karun, nagalikoliko na ini.
Luyag naman sini nga maiblik ang anay orihinal nga banas sang mga sapa.
Suno kay Gustilo, magasugilanon ini sa mga landowners kun pwede nga ibalik na ang banas sang sapa kag ang gobyerno ang magagasto.
Nahibaluan nga kalabanan sa mga sapa ang nasulod na sa nasakupan sang mga titulado ng duta.
Wala naman problema sa pagpang-utod sang kahoy ang ciudad bangod madugay na nga wala sang kahoy sa bukid bangod sa ilegal nga pagpang-utod sadto.
Paathag ni Gustilo nga gamay lang ang forest land sa San Carlos City.
