Amat-amat na nga nakapauli ang mga residente sa ciudad sang Victorias nga nag-evacuate matapos nga nagtaas ang tubig-baha kasunod sang pagbubo sang ulan halin kahapon tubtob kaina sang aga.
Sa interview sang Bombo Radyo Bacolod kay Victorias City Disaster Risk Reduction and Management Office head Rodolfo Retirado, ginpahayag sini nga mga alas-10 tubtob alas-11:00 sang gab-i sila nagsugod sang pang-rescue matapos nagtukar ang second alarm nga nagapatimaan nga nag-awas na ang tubig sa suba.
Suno kay Retirado, kapin 1,100 ka mga pamilya ang apektado sang pagbaha sa ciudad sang Victorias.
40 porsyento sang mga apektado sang pagbaha ang nagikan sa Victorias Milling Corporation area nga ginabug-usan sang anom ka mga barangay.
Suno kay Retirado, nagpauli na kaina sang aga ang kapin 800 ka pamilya nga nag-evacuate sa Coliseum matapos nga nagsubside na ang tubig-baha sa ila mga panimalay.
Nahibaluan nga pila sa mga ginhimo nga evacuation centers amo ang coliseum, cultural center, barangay halls kag mga simbahan.
Samtang, nagapabilin gihapon ang 83 ka mga pamilya ukon 363 ka mga indibidwal nagikan sa apat ka mga barangay sa Our Lady of Victory Parish sa ciudad sang Victorias.
Suno kay Joyce Liza, City Social Welfare and Development officer, padayon sila nga nagahatag sang tubig kag pagkaon para sa mga evacuees nagikan sa Barangays 13, 3, 6 kag 7.
Ginakabalak-an naman sini bangud nga wala sila sang beddings para sa mga residente ilabi na sa mga nagabusong kag mga lapsag.
