Ginaalerto sang kapulisan ang mga gas stations sa ciudad sang Bacolod batok sa modus sang pila ka nagapanag-iya sang pribado nga salakyan nga nagapalagyo sa ila nga balayran sa pagbakal sang gatong.
Sa interview sang Bombo Radyo kay Police Lt. Greeky Cayao, deputy station commander sang Bacolod Police Station 4, duha na ang narecord nila nga kaangay nga nagluntad sang Agusto 27 kag Setyembre 10 sa Total sa CL Montelibano Avenue kag Eco Oil sa Burgos Street.
Naggwa naman nga isa lang ang suspetsado sa duha ka insidente nga ginkilala kay William Ong.
Suno sa pump boy nga nagpablotter sa police station, nagpatughong ang driver sang pula nga Mitsubishi Montero Sport nga si William Ong apang nagpalagyo ini sa iya nga balayran.
Suno kay Cayao, sarang makasuhan sang estafa si Ong kun verified nga siya ang suspetsado.
Nagalibot naman ang mga personnel sang Police Station 4 agud magremind sa management sang mga gas stations nga imonitor ang kaangay sini nga insidente agud nga sila ang mangin aware.
Nagpanugyan man ini sa mga pump boy nga kuhaan sang plate number ang mga salakyan paagi sa pagsulat sini ukon pagkuha sang litrato agud mahapos ang paglocate kun sila ang malagyo.
Nagpanawagan man ini sa suspetsado nga untatan na ang kaangay nga modus sa isigkapareho.
