Naghisugot ang mga gobernador sa isla sang Panay nga ipatuman ang border restriction sa ila nga mga lugar subong nga bulan bangud sa pamahog nga dala sang coronavirus disease 2019 9COVID-19).
Sa ginpatigayon nga pagsinapol sang Regional Disaster Risk Reduction and Management Council (RDRRMC) 6 kahapon, nahisugtan nga i-implementar ang mga Executive Orders angot sa precautionary measure sa COVID-19.
Suno kay Office of the Civil Defense Region 6 director Jose Roberto Nuñez, iya ginpahayag nga magalawig tubtub sa Marso 31, 2020 ang border restriction sa kada probinsya.
Suno diri, liwat naman nga magasapol ang mga local officials sa masunod nga bulan agud iduso ang unified One Panay executive order angot sa community quarantine.
Paathag ni Nuñez, paagi diri, mahimo na makabyahe sa bug-os nga Panay lakip na sa Guimaras nga wala sang mga limitasyon.
Dugang pa sang OCD-6 director nga nahisugtan man sa pagsinapol nga ang mga pulis ang magapanguna sa pagpatrol sa borderline kag sila man ang maga-identify sang strategic areas para diri.
Ma-coordinate naman ang mga Provincial DRRMOs sa mga director sa kada Police Provincial Office sa pag-conduct sang checkpoint kag sa pagpatrol sa border line.
Magahingyo man ang OCD sa 3rd Infantry Division nga kun pwede magamit ang mga air assets sini agud magtransport sang mga Personal Protective Equipment (PPEs) nagikan sa Department of Health central office padulong sa regional office.
