Nagpatigayon na sang simulation exercises (simex) ang Negros Occidental Police Provincial Office (NOCPPO) kaina sa skeletal security plan para sa Panaad sa Negros Festival 2024 nga maga-umpisa sa Lunes.
Sa interview sang Bombo Radyo Bacolod kay NOCPPO Director Police Col. Rainiero de Chavez, nagadangat sa 1,102 ang igadeploy nga security personnel kun sa diin 90 porsyento diri ang kapulisan.
Magluwas sa mga personnel sang NOCPPO, may mga I-deploy man gikan sa Philippine Coast Guard, Bureau of Fire Protection, Highway Patrol Group kag iban pa.
Ang Bacolod City Police Office (BCPO) ang magadeploy man sang bulig, apang bangod nakita nga masarangan na sang mga tawo, wala na ang mga ini nagpangayo sang dugang pa nga augmentation gikan sa iban nga mga Provincial Police Office.
Apisar sina, sa masunod nga mga inadlaw, ginalantaw man ni de Chavez nga mahimo magpadala sang dugang nga augmentation ang Police Regional Office 6.
Magluwas sa security preparation, ginapahanumdom man sini nga humalin Abril 15 tubtob 21, suspendido ang permit to carry firearms sa bilog nga Negros Occidental.
Matapos ang simex, deretso na nga gindeploy ang iban sa mga personnel agud nga sila ang plastado na para sa Lunes, ang umpisa sang Panaad sa Negros Festival 2024.// Panugyan lamang ni De Chavez sa mga personnel nga ayuhon ang trabaho kag maghalong.
Bangod mainit ang tiyempo, ginpaseguro naman sini nga may nakaplastar nga medical personnel.
Samtang panawagan man sini sa mga festival goers nga likawan ang magdala sang mga matalom nga bagay samtang temprano man nila nga ipahibalo ang mga pagbag-o sa traffic route agud indi magtalang-talang ang mga salakyan kag magtuga sang traffic.
