Padayon pa ang imbestigasyon sang Bacolod Police Station 2 sa nagbilin sang utod nga nawala nga tiil, kamot kag pares sang dulunggan nga nasulod sa H&M bag kag ginsulod sa sa sako nga may sulat nga William De Arca protector ni Hanz Lopez ang druglord” kag frozen ang body parts.
Sa interview sang Bombo Radyo Bacolod kay Police Captain Glenn Montaño, station commander sang Bacolod Police Station 2, nagcoordinate sila sa National Bureau of Investigation-Bacolod kag nahibaluan nga agent sa nasambit nga ahensiya si De Arca.
Ginlantaw man nila ang CCTV footage sa area apang wala man naga-andar kag ginatinguhaan pa nila nga makakuha sang CCTV footage malapit sa opisina sang NBI agud nga matumod ang nagbilin sini.
Suno kay Montaño, ginalantaw sini nga pamahog sa personnel sang NBI ang pagbilin sang sako nga may unod nga parte sang lawas.
