Nagdangat na sa 17 ka mga Local Government Units (LGU) sa probinsya sang Negros occidental ang apektado sang African Swine Fever (ASF) matapos makarecord sang bag-o nga kaso sa tatlo ka mga banwa.
Ini ang ginlakipan sang banwa sang Isabela, La Castellana kag Binalbagan.
Suno kay Negros Occidental Governor Eugenio Jose “Bong” Lacson, apisar nga nadugangan ang numero sang mga lugar nga may kaso sang ASF, mas kontrolado sa subong ang sitwasyon kun ikumparar sang nakaligad bangud may ihibalo na ang mga hog raisers kag ang probinsya kun ano ang nagakadapat himuon.
Suno sa Gobernador nga sa kabug-usan nga 90,981 nga hog population sa mga apektado nga lugar, 2,338 lamang diri ang narecord nga napatay bangud sa ASF.
Pahayag sini, indi na amo kadasig ang paglapta sang ASF kun ipaanggid sang nakaligad.
Ginklaro naman sini nga bisan may 17 ka mga LGUs nga nakarecord sang kaso sang ASF, indi tanan nga nagakapatay nga baboy sa lugar ang tuga sang nasambit nga balatian.
Suno pa sa Gobernador, nabuhinan ang nagakapatay nga baboy bangud sa mas hugot nga pagpatuman sang disease surveillance, biosecurity measures,kag mga response protocol batok sa ASF.
Samtang, nakarecord naman sang mga bag-o nga kumpirmado nga kaso sang ASF ang probinsya sang Negros Oriental, partikular na sa banwa sang Amlan kag Siaton, kag sa ciudad sang Tanjay.
