BACOLOD CITY — Nagapadayon ang imbestigasyon sang mga otoridad sa nagluntad nga komosyon sa baybayon sa tunga sang Bantay Dagat sang Iloilo kag sang isa ka fishing vessel kun sa diin isa ang patay samtang isa ang pilason.
Sa inisyal nga impormasyon ni Lt. Rodolfo Delapeña, commander sang Coast Guard Station Iloilo, naglab-ot kahapon sang hapon sa kadagatan sang Concepcion, Iloilo ang MV Glory of the Sea nga ginapanag-iyahan sang taga-ciudad sang Bacolod kag taga-Sagay, Negros Occidental naman ang kapitan kag mga tripulante sini.
Gin-inspeksyon sang Provincial Bantay Dagat sang Iloilo ang nasambit nga fishing vessel matapos gin-tsekyar sa Coast Guard Sub-station Sagay kag nahibaluan nga wala ini sang mga dokumento gikan sa Maritime Industry Authority (MARINA).
Sa pag-inspeksyon nagluntad ang komosyon kun sa diin gin-agaw sang kapitan sang fishing vessel nga si Vivencio Espinosa, 40-anyos sang Kamantigi, Brgy. Old Sagay, Sagay City ang armas sang isa ka miembro sang Bantay Dagat nga amo ang nakabuno sa iya.
Nabun-an man ang utod ni Espinosa nga si Jonel, 36, sang pareho man nga lugar.
Suno sa hepe sang Sagay City Police Station Chief Inspector Robert Mansueto, ginapanag-iyahan ni Jonel Espinosa ang nasambit nga fishing vessel kag posible himata man ini sang napatay.
Sa karun, yara sa kustodiya sang Sagay police ang crew sang fishing vessel nga suno naman kay Lt. Delapeña isa ka trawler.
