Nabaton na sang opisina sang bise presidente nga amo man ang education secretary ang reklamo sang mga manunudlo sang Rizal Elementary School batok sa school principal.
Sa interview sang Bombo Radyo Bacolod kay Dr. Chris Sorongon, satellite manager sang Office of the Vice President, nabaton na sini ang complaint kag gindala na sang staff ni Vice President Sara Duterte matapos nga nagpadulong ang mga ini sa syudad sang Bacolod para sa advance party sang Sabado.
Nahibaluan nga sang Domingo, Oktubre 23, magapadulong kuntani sa syudad sang Bacolod ang bise presidente agud nga makigbahin sa selebrasyon sang highlights sang Masskara Festival apang wala madayon.
Suno kay Sorongon, nabaton naman sini ang receiving copy matapos nga mabaton na sang central office ni Vice President Duterte ang complaint.
Suno diri, ang ila nga mahimo sa karun ang batunon lamang ang complaint kag ginapasa lamang sa opisina sang bise presidente.
Sa karun ginahulat sang mga manunudlo ang resolusyon nga ipagwa sang Division Office sang DepEd Bacolod City angot sa complaint sang 30 ka manunudlo sang Rizal Elementary School batok sa school principal nga si Cristina Gemora.
