Natigayon nga nakilal-an kag nadakop ang lima ka menor de edad nga babayi kag isa miyembro sang LGBTQ nga nagkastigo sa isa ka menor de edad man nga babayi sa Don Salvador 1 barangay Tinampaan, Cadiz City, Negros Occidental.
Naglapta sa social media ang mga videos sa pagkastigo sang mga kabataan nga babayi sa biktima.
Makit-an sa video ang pagsakit sa biktima paagi sa pagsumbag, pagsipa, paggunit sang buhok, paguyod sa biktima kag may isa pa nga ginlumpatan ang nagahigda na nga biktima.
Mabatian naman ang pagpakit-looy sang biktima nga untaton na ang pagpanakit sa iya kag nagasinggitan pa ini pangita sa iya iloy.
Ang nagavideo isa ka miyembro sang LGBTQ.
Sa interview sang Bombo Radyo Bacolod kay Police Lieutenant Daleen Grace Loreno, Deputy Chief of Police for Administration sang Cadiz City Police Station, sang Disyembre pa natabo ang insidente apang natukiban sang isa ka ginikanan sa cellphone sang iya bata ang mga videos.
Suno diri, ang mga involved nga minors naga-edad sang 12 tubtob 15.
Iban sa ila nadakpan sang kapulisan kag gin-esturya na kun sa diin nag-intervene man ang Department of Social Welfare and Development.
Nahibaloan naman nga ang biktima nag-agom sang mga pilas kag ginpaidalom na sa Xray.
Mensahe ni Loreno sa mga ginikanan nga hatagan sang insakto nga guidance ang mga kabataan ilabi na kun may gina-updan nga grupo nga nagahimo sang indi maayo.
