Nagakalipay ang mga biktima sang PNP recruitment scam sa banwa sang La Castellana nga nadagdagan na sang warrant of arrest sa kaso nga ‘estafa’ ang apat ka mga suspetsado kalakip na ang duha ka mga pulis nga assign sa Bacolod City Police Office.
Madumduman nga ang kaso ang natabo sang Setyembre tinalikdan nga tuig kun sa diin nagdangat sa 45 ang mga nabiktima sa banwa sang La Castellana nga nakuhaan sang P250,000 tubtob P300,000 kada isa, kabaylo sa pasalig nga sila ang segurado nga makasulod sa hanay sang Philippine National Police.
Pila sa mga biktima ang nagpangutang pa sang dako kag nagbaligya sang mga propedad agud lamang makabayad.
Ang recruiter ang ginkilala nga si Mary Jun De Los Santos, samtang naangot man diri si Sangguniang Bayan member Donato ‘Natnat’ Dumaguit.
Si Dumaguit ang ginpalos na sa Sangguniang Bayan matapos nga wala na magpakita kasunod sang issue, samtang si Delos Santos ang subong man nga indi na makit-an.
Sa pihak nga bahin ang duha ka mga PNP personnel gikan sa Bacolod Police Station 4, ang nagsungka naman matapos maggwa ang warrant of arrest kag nakabayad naman sang pyansa para sa temporaryo nga kahilwayan.
Sa interview sang Bombo Radyo Bacolod kay Police Major Rhojn Darell Nigos, hepe sang La Castellana Municipal Police Station, ini na ang resulta sa pagfile sang kaso sang 41 sa mga biktima sang PNP recruitment scam.
Ginakalipay naman sang mga biktima kag ila pamilya nga may development na sa kaso.
Samtang nagapasalig man ini nga ang kapulisan ang padayun nga magaserbisyo agud mapatuman ang layi kag mahatag ang hustisya.
