Nakabalik na sa ila mga puluy-an ang mga pumuluyo nga nag-evacuate sa Sipalay City kag banwa sang Cauayan sang Domingo bangud sa Typhoon Karding.
Suno kay Dr. Zeaphard Gerhart Caelian, pinuno sang Provincial Disaster Management Program Division (PDMPD), may ginpatigayon nga preemptive evacuation sa Sipalay kag Cauayan kag ini ang nagapatimaan nga nagaalerto na gid ang mga pumuluyo.
Suno sa Caelian, nagsaka ang tubig sa suba sa Cauayan gani nag-evacuate ang pila ka mga residente sang Barangay Caliling kag Barangay Inayawan kag nagtinir sa mga buluthuan.
May mga power outages man nga natabo kahapon sa nasambit nga banwa.
Sa ciudad sang Sipalay, suno sa PDMPD Head, nagdangat sa kapin P1.5 million ang initial nga balor sang halit nga gintuga sang bagyo samtang sa sektor sang Agrikultura, 63 ka mga mangunguma kag 62.97 hectares sang duta ang naapektuhan.
Nagdangat sa 9.97 metric tons ang production loss nga gintuga sang bagyo sa mga pananum sa Sipalay.
Una na nga ginpasaka ni Governor Eugenio Jose “Bong” Lacson sa red alert status ang monitoring sang mga operation centers kag mga DRRM offices para sa gilayon nga pagresponde sa mga insidente.
Nagpanugyan man ini sa mga pumuluyo nga mamati kag magsunod sa mga panugyan sang gobyerno ilabi na kun may kalamidad bangud para man ini sa kaayuhan sang tanan. SAMTANG….kabug-usan nga 16 ka pamilya kag 38 ka mga indibidwal ang nag-evacuate sa Barangay Inayawan kag Barangay Caliling sa banwa sang Cauayan, Negros Occidental.
Sa interview sang Bombo Radyo kay Mayor John Rey Tabujara, ginakabig na nga balantayan ang nasambit nga mga barangay kun may kalamidad bangud identified flood prone area ang mga ini gani preparado ang mga opisyales sang barangay.
Suno diri, bangud sa kakusog sang ulan kag high tide, nagsaka ang tubig gani nag-evacuate ang 15 ka pamilya kag 32 ka indibidwal sa Barangay Caliling samtang isa naman ka pamilya sa Barangay Inayawan.
Suno sa alkalde, nakapauli na ang mga ini kahapon bangud nangin matawhay naman ang sitwasyon.
Padayon nga nagapahanumdum si Tabujara sa mga pumuluyo nga mag-ulualigmat kag mangin responsable sa tion sang kalamidad.
