Nagalaom ang mga nagabaligya sang Christmas lanterns malapit sa Mandalagan Bridge diri sa Bacolod nga maubos ang ila nga baligya antes ang ila nga pagpauli sa Luzon agud nga magselebrar sang Paskwa kaupod ang ila nga pamilya.
Sa interview sang Bombo Radyo kay James Barnachea, ila gindugangan ang ila trabahante nga sa karun madamo na gid ang ila produkto.
Pahayag ni Barnachea, masami nga gikan sa siyudad sang Silay kag Bacolod ang ila mga customer samtang may nagabakal man nga mga local government unit.
Suno kay Barnachea, manami ang lakat sang negosyo halin alas-7:00 tubtob alas-8:00 sa gab-i kun sa diin makit-an kag mas maapresyar ang manami nga disenyo kag suga sang mga parol.
Suno diri, wala sang pagbag-o sa presyo sang Christmas lanterns bisan nagsulod na ang bulan sang Disyembre, samtang nagadepende naman ang presyo sini sa kadakuon sang lantern.
Tubtub na lamang Disyembre 19 ang ila nga pagbaligya sa Barangay Mandalagan bangud magapauli ang mga ini sa ila nga pamilya kun sa diin lauman ang bagsak-presyo sa mga parol bangud kinahanglan nga ini ang paubuson antes sila magbiya sa Bacolod.
