Gindugukan sang madamo nga mga pumuluyo ang satellite voter’s registration sa Barangay Alijis, Bacolod City sang Sabado.
Sa interview sang Bombo Radyo Bacolod kay Punong Barangay Deogracias “Donnie” Dela Vega, gin-ayo sini mismo kay Bacolod City Mayor Alfredo “Albee” Benitez kun mahimo nga mapatigayon sa Barangay Alijis ang satellite voter’s registration.
Aminado ini nga madamo sang mga nagapanawagan nga mapapalapit ang voter’s registration bangod nabudlayan ang mga residente nga magpadulong sa Commissiion on Election (COMELEC) – Bacolod Office nga tuman ka laba sang pila.
Sang Sabado, wala pa alas-8:00 sang aga, tuman na ka damo sang mga nagpila nga residente kun sa diin sa ila cut off alas-3:00 sang hapon, nakarecord na sang 600 ka mga voter’s registrant nga ginalakipan sang 100 nga senior citizen kag persons with disability (PWD) kag 500 nga regular voters.
Matawhay man nga napatigayon ang satellite voter’s registration sa bulig sang mga personnel gikan sa Barangay, mga Comelec personnel kalakip na ang ila legal adviser kag head kasubong man sa presensya sang mga katapo sang Bacolod City Police Station 7.
Yara man mismo ini agud maseguro nga kun may-ara sang mga concerns ukon kinahanglan sang validations, indi na madugayan ang problema kag gilayon nga masolbar.
Paathag ni Dela Vega, may patakaran ini sa Barangay Alijis nga indi makaproseso sang mga dokumento sa Barangay kun indi rehistrado nga botante sa lugar.
