Isa sa nagapanguna nga kinahanglanon sang mga naapektohan sa nagluntad nga sunog sa Tambi Palad, Brgy 10, amo ang underwear kag hygiene kit ilabi na sa mga babaye kag mga kabataan.
Sa interview sang Bombo Radyo kay Nadine Abellar, isa sa mga apektado sa sunog, nagakinahanglan gid sila sang mga panapton para sa mga kabataan ilabi na ang uniporme para sa mga studyante kag panapton man para sa mga lapsag.
Santo sa report sang Department of Social Services and Development (DSSD), nagdangat sa 28 ang totally damaged nga balay samtang anum ang partially damaged, 55 ka mga pamilya ang apektado nga may yara sang kabug-usan nga 139 ka indibidwal, lakip na diri ang tatlo ka lapsag, tatlo ka gagmay nga bata, 13 ka studyante, pito ka senior citizen, isa ka person with disability, kag isa ka busong nga amo si Nadine Abellar.
Suno kay Abellar, indi pa nila matumod ang gintunaan sang kalayo apang may yara sila sang impormasyon tuhoy sa ginalegar nga balay nga ginsugudan sang kalayo.
Suno diri, nakit-an ang isa ka residente nga lalaki ginabanta nga nagaedad 59 anyos sang nasambit nga lugar nga nagguwa sa iya balay kag may bitbit nga isa ka plastic nga may unod nga mga panapton.
Antes pa man magluntad ang sunog, nakapanimaho na sila sang baho nga kaangay sang saway gani gilayon nila gintsekyar ang poste apang wala man sang nakit-an nga kalayo.
Suno kay Abellar, kwestiyonable para sa ila ang nagluntad nga sunog.
Sa karon, ang mga apektado ang yara sa daycare center sang ila Barangay kag ang iban yara sa Barangay Hall.
