Duha lamang ka kandidato ukon partido sa 2022 elections ang ginasuportahan sang mga Filipino sa Japan.
Sa interview sang Bombo Radyo kay International Correspondent Josel Palma direkta sa Japan, nagadangat sa kapin 300,000 ang mga Filipino sa Japan kag natunga lamang sanday Presidential aspirant former Senator Ferdinand “Bongbong” Marcos Jr. kag Vice President Leni Robredo ang mga supporters.
Suno kay Palma, wala ini sang may nabatian ukon nakit-an nga mga supporters sang iban nga Presidential aspirants.
Suno diri, nagapanguna sa Japan si Marcos kag nagapangaduha si Robredo.
May yara naman sang ginatawag nga Project HAPPInk ang mga supporters ni Robredo kun sa diin nagapatigayon sila sang programa, nagahatag sang mga mensahe sang pagpalangga kag kalipay ang tagsa-tagsa sa mga Filipino kag nagasabat sila sa pamangkot kun ngaa si Leni ang ila botohon.
Ang kwarta nga ila maagum sa programa ang ginagamit naman sa pagbulig sa mga nabiktima sang mga kalamidad.
Samtang, may yara man sang patigayunon nga BBM-Sara Chapter We Unite As One nga parada sa Pebrero 27 kun sa diin magalawag sang isa ka oras.
Ang sarang nga makatambong diri amu ang mga nakaparehistro lamang kag ang may yara sang official ID nga BBM-Sara.
Ang nasambit nga parada ang paga-updan sang ambulansya, kapulisan kag media.
Indi naman dako nga issue sa mga OFW sa Japan kun indi pareho ang ila suportahan nga kandidato kag wala nagakaapektuhan sang politika ang ila mga relasyon.
