Wala nagbyahe ang kabug-usan nga 24 ka mga modernized jeepney units sang Cebu People’s Multipurpose Cooperative bilang pagpakita sang pagprotesta sa ila pamunuan.
Ang nasambitan nga mga units ang nagabyahe sa routa nga fortune towne – central market.
Sa interview sang Bombo Radyo Bacolod kay Jocelyn Libo, isa sa mga operators, sila ang nagsulod sa kooperatiba ang 2021 pa lamang bangod sa kahadlok nga madulaan sang palangabuhian, kag sila man ang naggasto sa pagproseso kalakip na ang 5 percent nga downpayment.
Sa umpisa, sang may apat ka units pa lamang, naghingyo pa ang pamunuan kun sila ang makapatigayon sang boluntaryo nga pagbyahe bangod sila ang wala pa sang inugbayad, nga ila man ginsakripisyohan.
Aminado si Libo nga maayo man ang pamalakad sa umpisa tubtob nga may ara sang mga tawo nga ginkapoy kag wala nakabyahe.
Nakibot na lamang ini sang isa-isa na nga ginpahalin ang lima ka mga drivers, kag ginpang-islan sang lain nga tawo.
Bangod sa wala sang ipasweldo, gindula man ang collector kag nagbutang na lamang sang box kun sa diin sarang mabutang ang mga nakolekta nga plete.
Kalakip sa apektado ang isa ka driver nga nagaserbe man nga security guard, nga hinali na lamang ginhambalan nga tubtob nalang bwas makaserbisyo bilang security guard, bangod ini ang islan na sang blue guard.
Ginakwestyon ni Libo bangod sa kada byahe nila sang modernized jeep, ginadeklarar sang pamunuan sa kooperatiba nga pierde ang ila byahe.
Apang kun ila pangitaan sang financial statement, ginapahayag lamang sang mga ini nga tingubon na lamang sa isa ka tuig.
Indi naman magpati si Libo nga sa kada adlaw pierde gid ang ila pagbyahe.
Ang mga drivers kag collectors ang nagabatun lamang sang P450 nga sweldo kag may qouta nga P6,000 sa kada adlaw.
Apang tuyo sang pamunuan sa kooperatiba nga ang qouta ang pasakaon pa sa P9,000.
Sila ang halos makaapat naman nga nagpadala sang sulat nga makighinun-anon sa officers sang kooperatiba apang sila ang ginapabungulan lamang, kag ginhambalan nga sa abogado na lamang mag-atubang.
Panindugan ni Libo nga humalin sadto sila ang nagasunod sa patakaran sang public utility vehicle modernization program, kag subong lamang naglapas pinaagi sa indi pagbyahe.
