Ginpahayag sang acting mayor sang Bacolod City nga pagabatunon kag paga-akomodaron ang mga operators sang traditional jeepneys nga luyag mag-operate sang modernize jeepneys apang limitado lamang ang slots.
Madumduman nga kahapon, masobra 700 ka mga operators kag drivers sang Federation of Bacolod City Drivers (Febacda) Association; Sentrong Samahan ng mga Tsuper at Operators Negros (SSTONE) kag United Drivers Operators Center (UNDOC) ang nagtipon sa Bacolod City Government Center (BCGC) grounds agud nga ipahayag ang ila nga mga problema angot sa ginapatuman nga Public Utility Vehicle Modernization Program.
Ang mga operators kag drivers ang gin-atubang ni Bacolod City Vice Mayor El Cid Familliaran, Bacolod City Administrator Atty Pacifico Maghari III, Bacolod City Land Transportation Office Head Renato Novero, Bacolod Traffic Authority Office Police Major Junji Liba kag Bacolod City Police Office director Police Col. Thomas Joseph Martir agud pamatian ang luyag nga ipalab-ot sang mga drivers kag operators.
Kahapon, nagsulat ang mga operators kag drivers sa syudad nga buligan sila nga mapasugtan sila nga magbiyahe samtang nagaproseso para sa renewal.
Didto nakasugtan nga sila ang pahanugutan nga magbiyahe liwat kag wala sang magdakop sa ila apisar nga kulang ang mga ini sa papeles sa sulod sang duha ka semana samtang sila ang nagaproseso pa sang mga papeles kag nagapangita sang pamaagi agud makasulod sa kooperatiba.
Sa interview sang Bombo Radyo kay Vice Mayor El Cid Familiaran, ginpahayag sini nga pagabatunon kag pagaakomodaron ang mga traditional operators ng luyag mag-operate sang modernized jeepney apang limitado lamang ang slots para sa mga ini.
Suno diri, 199 units sang modernized jeepney ang gin-aprubahan sang Land Transportation Franchising and Regulatory Board kun sa diin 173 ang ga-operate na sa ciudad.
Ginalauman naman nga madamo pa sang units ang masulod ilabi na sini nga bulan.
Suno sa iya, may masobra 600 pa nga traditioal units nga mga miyembro man kag sa masunod nga tuig pa maga-expire ang prangkisa.
Ginpahayag ni Familiaran nga ang local government unit ang nagasunod lamang sa mando kag ang LTFRB amu ang nagaimplementar sini.
