Ginpahayag ni Bacolod City Councilor Wilson “Jun” Gamboa Jr., convenor sang Water Watch Negros nga wala sang ihibalo kag nakibot ang mga opisyales sa ciudad sang Bacolod sa pagbag-o sang pamunuan sang Bacolod City Water District.
Madumduman nga gin-anunsyar lamang kahapon ang ni Bacolod City Lone District Representative Alfredo “Albee” Benitez nga si Atty. Valerie Anne Holero, anay regional vice president sang Philhealth Region 6 ang bag-o nga General Manager sang BACIWA.
Pahayag ni Gamboa nga wala man lang sang ginpadala nga official communication sa Bacolod City Government angot sa development.
Suno diri, wala mahibaluan kun sin-o ang nagdesisyon bangod bisan ang BACIWA Board of Directors ang wala sang ihibalo sa pagbag-o sang liderato.
Dugang pa ni Gamboa nga wala man ini sang nakita nga problema sa pagpamuno sang nagligad nga General Manager nga si Engr Michael Soliva.
Kwestyon man para sa konsehal ang background ni Holera, kag kun ano ang nahibaluan sini sa operasyon sang water utility.
Indi naman bag-o ang hinali nga mga pagbag-o sa BACIWA bangod ini ang kaangay man sang nagsulod sa Joint Venture Agreement sa PrimeWater nga wala ginkonsulta sa pumuluyo, kag ginkakibot na lamang sang tanan.
Aminado ini nga nakaligad nga tuig pa gin-anunsyar ni Benitez nga may bag-o nga nagapanag-iya sang Primewater, apang sa pagkahibalo sini, wala sang may natabo nga formal sale.
