Mas convenient para sa mga pasahero ang pagsakay sa modernized jeepney sangsa magsakay sa traditional jeepney.
Sa interview sang Bombo Radyo kay JC Turmo, residente sang banwa sang Murcia apang nagatrabaho sa isa ka establishmento sa Barangay Bata, Bacolod City, sang tinalikdan, sa traditional jeepney sila nagasakay kag nagikan sa trabaho, mabatyagan sini ang kagin-ot kag stress.
Suno kay Turmo, sa modernized jeepney, maskin P2.00 lamang ang labaw sa plete, matawhay kag relaxing sa feeling bangud may aircone.
Suno diri, kahapon ang iya labing una nga beses nga nakasakay sa bag-o nga jeep kag ginakalipay gid sini ang pagbyahe.
Suno naman kay Jenny Gonzales, pasahero man sang Bata-Libertad Loop nga modernized jeepney, mas convenient para sa iya ang ini nga unit bangud malapad ang espasyo, indi tuman ka crowded kag madamo ang makasakay.
Suno kay Gonzales, mas madasig ini kun ikumparar sa daan nga model.
Suno sa iya, sa traditional nga jeep, madamo pa sang aberya apang sa modernized jeepney, daw ka-smooth sang byahe bangud bag-o pa ang unit kag mas safe para sa iya.
Suhestiyon man sini sa mga magasakay nga may dala nga mga basa kaangay sang mga isda, doblehon lamang ang suludlan agud indi maglapta ang baho sa sulod sang jeep.
