Nagaagwanta gihapon sa malaba nga pila ang mga pasyente sa gwa sang Corazon Locsin Montelibano Memorial Regional Hospital antes makakuha sang numero agud nga maakomodar sang mga doktor.
Sa pagtsekyar sang Bombo news team, kalabanan sa mga nagapila ang magapakonsulta sa out patient department kag magapaidalom sa follow-up check-up.
Suno kay Roding Regiño sang Barangay Mansilingan, Bacolod City, pasado alas-4:00 pa lang sang kaagahon sang nagpila siya sa gwa sang CLMMRH agud nga makapacheck-up sa Internal Medicine Department.
Suno kay Regiño, apat na ka adlaw ang balik-balik niya sa ospital bangud indi siya makakuha sang numero bisan may yara na ini sang schedule.
Suno sa iya, indi siya mag-agwanta sa pagpila sa CLMMRH kun may yara ini sang kwarta nga ipakonsulta sa pribado nga balay-bululngan.
Bangud 32 lang ka pasyente ang maakomodar kada adlaw, masami ini nagakalab-utan sang cut-off gani nagabalik naman pagkasunod nga adlaw.
Mas malala pa gid diri ang ginaagwanta sang mga pasyente nga nagikan sa out of town.
Suno kay Ronald Arnaez sang Victorias City, alas-7:00 kagab-i sila nagsugod sa pagpila sa CLMMRH, upod ang iya iloy nga amo ang magapakonsulta.
Suno diri, maulihi sila sa pila gani ginpakamaayo nila nga magpila na diri halin sa gab-i.
Nagpatun-og sa pila si Arnaez samtang ang iya iloy naman ang nagtinir sa carinderia sa tabok sang ospital.
