Nagpanugyan ang spokesperson sang Negros Occidental Police Provincial Office (NOCPPO) sa mga kapulisan nga tsekyaron gid ang ginagamit nga salakyan antes magbiyahe agud nga malikawan ang aksidente kaangay sang natabo sa katapo sang 604th company sang Regional Mobile Force Battalion 6 matapos maaksidente ang ginasakyan nga JMC Troop Carrier sa National Road, Purok 1, Barangay Caningay, Candoni, Negros Occidental kahapon sang aga.
Sa interview sang Bombo Radyo Bacolod kay Police Lt. Judesses Catalogo, estable na ang kondisyon sang onse sang kapulisan nga nasamaran sa aksidente kahapon.
Suno kay Catalogo, pabalik na ang mga kapulisan nagikan sa nabukid nga bahin sa banwa sang Candoni sang nagluntad ang aksidente.
Suno sa tagpamaba sang NOCPPO, indi familiar ang driver sa dalan kag nakaeksperyensya pa sang mechanical error kun sa diin wala gilayon nagkagat ang preno.
Ginpasalamat lamang sang mga ini nga wala nagdirekta sa pil-as ang ginsakyan sang mga kapulisan nga katapo sang RMFB6.
Nagpanugyan man si Catalogo nga dapat antes maghalin ang mga kapulisan sa kampo dapat tsekyaron gid ang salakyan, tsekyaron ang oil, tubig, hangin kag makina kag tinluan gid bangud ini ang ginagamit sa adlaw-adlaw nga tanan.
Dugang pa sini, antes magsaka sa salakyan ugalion nga magpangayo sang pagubay nagikan sa Ginoo.
